अमुक असं का, तमुक असं का नाही
प्रश्न वाढतात रोजचे, उत्तर मिळत नाही
विचारांचा गुंता होतो आणि डोक्याचा भुगा
सोडवू प्रश्न कसे, कृपया कोणीतरी सांगा
मलाच पडतात का, प्रश्न असे क्लिष्ट अन अवघड ?
मीच वाहतोय का, नैतिकतेची अन तत्वज्ञानाची कावड?
तुम्ही करता का, विचार कधी खोल ?
मती जिथे गुंगते अन तत्वज्ञान ठरतं फोल ?
पण कधीतरी अचानक एखादं उत्तर मिळून जातं
अस्तित्वाचं सार थोडं थोडं उलगडून जातं
प्रश्न सतत पडणं, हेही वरदान नव्हे काय ?
रोज थोडं उलगडणे, हेच जीवन नव्हे काय?
मार्ग दाखवी तो गुरु, आणि चाले तो शिष्य
अनुभूतींचा प्रवास म्हणजेच तर खरं आयुष्य
त्यातूनही अनुत्तरित, राहतील काही गोष्टी
जन्म देऊन पुन्हा, संकेत देईल सृष्टी
- अंकुश
कोणत्याही टिप्पण्‍या नाहीत:
टिप्पणी पोस्ट करा